भैलीनी महिलाहरुलाई मेयरले बन्दुक ताकेपछि लफडा

re 29 1Google +1
डबली संवाददाता
३ कात्तिक

हेटौंडा । सबैतिर तिहारको रमझम छ । सबैका घरहरु उज्याला छन् । आगनमा भैली खेल्नेहरु पालैपालो आउने जाने गरिरहेका छन् । भैली समूहको सबैले सम्मानजनक आफ्नो गछेअनुसार रुपैयाँ र खानेकुरा दिँदै बिदाई गरिरहेका छन् । तर एउटा जनप्रतिनिधिले आगनमा आएकी महिला भैली समूहलाई राइफल ताकेका छन् ।

मकवानपुरको हेटौँडा उपमहानगरपालिकाका मेयर हरिबहादुर महतले देउसी खेलिरहेका महिलाहरुको समूहलाई दुव्र्यवहार मात्रै गरेन् बन्दुक नै तोके । उनले अवशब्द प्रयोग गर्दै जथाभावी गाली गरे । मेयर महतले बिहिबार राति हेटौँडा–५ सिँचाई टोलमा देउसी भैलो खेलीरहेका महिलाहरुलाई दुव्र्यवहार गर्दै बन्दुक तोकेका हुन् ।

भैलीनी समूहकी एक महिलाका अनुसार मेयर महत भैलो खेलिरहेको ठाउँमा गाडीमा आएर बन्दुक देखाउँदै चुप लागेर घरघर नगए उठाईदिने धम्की दिए ।

विगत एक दशकदेखि लाइसन्स लिएर बन्दुक राखेका महतले आफ्नै मतदाता महिलाहरुलाई बन्दुक ताकेपछि विवाद उत्पन्न भएको छ ।
मेयर महतले भैलीनीसँग रहेका एक बालकलाई कुटपिट गर्नुको साथै भैलो खेल्न प्रयोग गरिएका स्पीकर, माइकलगायतका साधनहरु फुटाएको भैली समूहले बताएको छ ।

आज (शुक्रबार) मेयरका अनैतिक गतिविधिविरुद्ध प्रहरीमा उजुरी गर्न तयारी समेत भएको थियो । तर, मेयर महत आफै आएर रक्सीका कारण आफूबाट गल्ती भएको भन्दै माफी मागेका कारण महिलाहरुले उजुरी भने दर्ता गरेनन् ।

उता मेयर महतले आफूसँग बन्दुक भएको स्वीकार गरेका छन् । उनले भैली समूहले भनेजस्तो आफूले बन्दुक नताकेको बताएका छन् ।

मेयर महतलाई भोट दिएकोमा हेटौंडाका महिलाहरुले पश्चताप गरिरहेका छन् ।